Como cada inicio de curso retomamos o noso programa didáctico NUMAX na Escola, que conta cun catálogo amplo e renovado de filmes para o seu visionado en pantalla grande acompañados de materiais didácticos e presentacións na propia sala de cinema.
Neste 2025 volvemos acoller a programación cinematográfica do WOS Festival, celebración anual da cultura alternativa e de vangarda. Nesta edición celebraremos tres sesións, do venres 12 ao domingo 14 de setembro, nas que exploraremos a historia da comunidade raveira —Free Party: A Folk History—, a natureza do son e a súa capacidade para modificar a nosa percepción do mundo —32 Sounds—, e as pegadas do xenocidio no espazo sonoro —The Diary of the Sky / Where the Language Fails Us—.
A Libraría NUMAX acolle a presentación do libro As obras póstumas (Xerais) de Diego Giráldez o venres 12 de setembro ás 19:00h. O autor estará acompañado polo xornalista Alfonso Pato. A entrada é libre ata completar aforo.
Falta moi pouco para a estrea oficial en salas de Romería, a agardada película de Carla Simón gravada na Ría de Vigo. Para recibila temos un evento moi especial para vós coa visita do director ferrolán Alberto Gracia, que debuta como actor no filme, para ofrecer presentación e coloquio. A sesión terá lugar o sábado 6 de setembro ás 19:00h con entradas xa á venda.
Retomamos a actividade «Dicir as marxes» cun encontro coa antropóloga Valeria Mata o xoves 11 de setembro ás 20:00h baixo o tíulo «Estar en paz coa ambigüidade». No encontro estará acompañada pola xornalista e escritora Xiana Arias. Esta actividade está comisariada pola Libraría NUMAX e subvencionada pola Deputación da Coruña.
Durante o mes de setembro, a nosa sección de Repertorio estará dedicada ao Cine arxentino moderno co ciclo Fulgores e fracturas deseñado por Ramiro Sonzini, cineasta e cofundador da revista La vida útil. O programa inclúe 5 obras esenciais que renovaron o cinema arxentino desde mediados dos anos 60 e arranca o martes 2 de setembro cun título de culto: Invasión, de Hugo Santiago. Entradas xa á venda para todas as sesións do ciclo.
