O Festival Internacional de Cine Curtocircuíto, que neste 2015 chega á súa 12ª edición, volve a Santiago de Compostela entre o 6 e o 11 de outubro. Cunha novidade: este ano, froito da afinidade entre ambos proxectos, NUMAX participará como sede do festival, o que achegará á nosa sala algúns dos grandes nomes desta edición como Jørgen Leth ou João Salaviza
O Super Tour Galego argallado por I'm The Mocker achegará a NUMAX ao crítico musical Kiko Amat o vindeiro venres 18 de setembro ás 19:00, onde presentará Chap Chap en compañía de Raquel Peláez. Este seu último libro é unha antoloxía confesional que inclúe artigos, listaxes, diatribas, columnas varias, pezas inéditas, pezas rexeitadas e panexíricos escritos entre 1987 e 2014.
Curtocircuíto celebrará o próximo xoves 10 de setembro ás 22h unha proxección especial en colaboración co festival WOSINC: Akounak Teggdalit Taha Tazoughai, de Mdou Moctar, primeiro filme da historia rodado en lingua tuareg. Moctar, protagonista do filme e expoñente principal do "blues do deserto", actuará tamén no Festival WOSINC. A entrada á proxección será libre até completar aforo e as invitacións poderanse recoller o mesmo día da proxección a partir das 20h.
Zan Hoffman, punk crooner de Kentucky, estará de xira por Galicia co seu Bodycocktail e fai parada en NUMAX o mércores 5 de agosto ás 19:00 para presentarnos o primeiro episodio de Hórreo no espazo.
Co gallo da reestrea de El mundo sigue, actualmente na carteleira do Cinema NUMAX, aproveitamos para recuperar a minuciosa análise da filmografía de Fernando Fernán-Gómez que o catedrático José Luis Castro de Paz realizara para Ediciones Cátedra no ano 2010. Castro de Paz estará na nosa libraría presentando Fernando Fernán-Gómez o vindeiro venres 17 de xullo ás 18:00, xusto despois do pase diario de El mundo sigue que ese día terá lugar ás 16:00.
