Un ano máis fainos moita ilusión anunciar que o Cinema NUMAX vai ser unha das sedes principais do 34 Festival Cineuropa, cunha proposta ampla e variada que inclúe obras gañadoras dos principais festivais de cinema de autoría do mundo. Velaquí tedes o detalle do programa para NUMAX que terá lugar do 9 ao 19 de novembro.
Alejandra Pombo pechaba a primeira sesión dos Discursos en acción, o noso ciclo de conferencias performativas. Co apoio da Área de Cultura da Deputación de A Coruña e comisariado por Performa, a Libraría NUMAX organizaba esta actividade para que cada artista convidado construíse unha proposta para acontecer no intre preciso da cita e do lugar proposto como escenario: a sala do Cinema NUMAX. Todos os vídeos resumos estarán dispoñíbeis na nosa canle de Youtube.
Xa temos preparado o menú do ciclo Os ollos verdes para a recta final do ano. As películas independentes máis arriscadas e anovadoras teñen o seu lugar na última sesión de todos os luns. Recorda que podes acadar 1 crédito ECTS e tarifa reducida na túa entrada se estudas na USC e te inscribes no ciclo.
Velaquí o segundo vídeo resumo dos Discursos en acción, un ciclo organizado pola Libraría NUMAX que buscaba o intercambio e a reflexión do público coa arte fóra dos contextos ou contedores artísticos tradicionais. Así foi a conferencia performativa do artista Suso Fandiño, «Os pintores da vida moderna. A cultura de masas nas orixes das vangardas». Co apoio da Área de Cultura da Deputación de A Coruña e comisariado por Performa, Discursos en acción converteu NUMAX nun espazo onde ensaiar propostas entre o divulgativo, o artístico, o escénico ou o audiovisual. O vídeo está tamén dispoñíbel na nosa canle de Youtube.
Debut é un ciclo outonal de conversas con autoras que debutaron en 2020 con primeiros libros ou primeiras incursións nun xénero literario. Comeza o xoves 29 de outubro ás 20h e para asistir é preciso reservar praza no correo [email protected], pois a capacidade da libraría é moi limitada, indicando a que encontro(s) se queres asistir. Os tres serán retransmitidos tamén a través da nosa canle de Instagram.
[FOTO: Álex de la Torre]
