Este venres 17 ás 20.30h, na libraría NUMAX, contaremos coa presenza de Javier Tolentino, director do programa de Radio 3 «El Séptimo Vicio», para falar connosco do seu libro 'El cine que me importa'
O vindeiro mércores 15 de abril ás 20:15 teremos o privilexio de acoller no Cinema NUMAX o realizador francés Jean-Charles Hue. Hue chega a Compostela para a preestrea do seu último filme, Clan salvaxe, que se estrea nas salas españolas, e tamén en NUMAX, o vindeiro venres 17 de abril.
Este domingo 29 teremos a honra de recibir en NUMAX a Lois Patiño para presentar o seu multipremiado filme Costa da Morte. Será na sesión das 20:00 e logo de rematada a proxección o noso público terá a ocasión de intercambiar impresións con el nun turno de preguntas e respostas.
Abre en Compostela NUMAX, unha cooperativa de traballo sen ánimo de lucro que pon a andar un cinema, unha libraría e un laboratorio gráfico e de vídeo.
Aki Kaurismäki achegouse para sorpresa de todos e acompañounos, xunta un grupo de avalistas do proxecto, na preapertura da sala, que aínda se atopaba en obras o pasado venres 13 de marzo. Antes da proxección, dirixiuse ao público: “A cultura humana non existe sen ideas tan burras como esta”. Despois, proxectouse o primeiro filme sobre a pantalla de NUMAX, a restauración dixital subtitulada ao galego do filme 'Nubes pasaxeiras', de 1993, que estará en cartel no cinema até a semana próxima.
Coa apertura de NUMAX, ofrecemos tamén ás persoas que se acheguen a oportunidade de conseguiren descontos abonándose. Deste xeito, poderase entrar ao cinema a prezo reducido (4,80€) en todas as sesións diarias do cinema e tamén obter un desconto nas compras da libraría (un 5%), aplicábel tamén na nosa tenda online. As persoas abonadas conseguen descontos en NUMAX e ao tempo axudan a manter en pé a única sala de cinema no centro de Santiago de Compostela e a única sala independente en versión orixinal de Galicia.
