Tes entre 18 e 25 anos? Gústache comunicar a túa paixón polo cinema? Dominas o inglés? Se cumpres estas tres condicións non deixes escapar a oportunidade de viaxar cos gastos cubertos ao Festival de Venecia para participar como xurado no 27 Times Cinema! Tes até o 31 de maio para enviarnos a túa candidatura. Unha iniciativa de Europa Cinemas, Giornate degli Autori, o Parlamento Europeo e LUX Film Prize. [Foto Kamil Klamut]
En NUMAX continuamos a dar os pasos necesarios para recuperar a nosa actividade tras estas semanas de confinamento, con toda a ilusión pero tamén a responsabilidade que requiren estes tempos. Nese sentido, alédanos informarvos de que a partir do luns 11 de maio volvemos abrir as portas da Libraría sen necesidade de cita previa. O horario de apertura será de luns a venres de 11:00 a 14:00 horas e de 17:00 a 20:00.
Aínda que polo de agora non é posible abrir as portas da Libraría e do Cinema NUMAX ao público, a partir do luns 4 de maio estará habilitada a recollida en tenda de pedidos da Libraría, sempre con cita previa.
En NUMAX vimos de chegar a un acordo coa plataforma de vídeo baixo demanda MUBI que permite a todas as nosas abonadas gozar durante 3 meses e de maneira gratuíta dos filmes do seu catálogo. Deste xeito, mentres NUMAX siga pechado, poderás acceder desde o teu ordenador, tablet ou televisión a unha selecta oferta co mellor cinema de autor clásico e contemporáneo.
Ante a declaración do estado de alarma, o Cinema e a Libraría NUMAX permanecerán pechados ata que se supere esta situación excepcional.
Desde o día de hoxe, venres 13 de marzo, no Cinema NUMAX aplicaremos unha redución do aforo da sala e o número de sesións diarias en coherencia coas recomendacións das autoridades sanitarias. Ademais, queda adiada a visita de Stefano Savona, director d'A familia Samuni, así como o seu encontro A cor das palabras programado para o sábado 14.
