Fabio Rivas reúne neste volume unha colección de relatos premiados en diferentes certames, un entremés e mais un texto inédito que ven agora a luz, varios anos despois da publicación do seu primeiro libro.

Unha cerimonia vodú en Benín, unha muller que se prepara para bordar o seu propio sudario, un pai disposto a todo por conservar o amor da súa filla ou os segredos que sobreviven durante xeracións conviven neste universo onde a culpa, a memoria e o desexo empurran os personaxes cara a decisións que non teñen volta atrás.

Cunha prosa que bebe da tradición oral e unhas imaxes nacidas da cultura popular, o autor achéganos uns contos que, lonxe de rematar na derradeira páxina, se acubillan dentro de cada un dos lectores.