É imprescindíbel coñecer o papel do Estado na economía dunha formación social, mais no caso da economía galega, precisada de dirección asistida, ese rol cobra forma decisiva. Alberto Turnes amósanos de forma mestra o camiño da intervención, orientación, dirección e acompañamento das institucións do Estado na Galiza actual, do que existe e do que sería preciso, contando con vontade política. O punto de partida volve situar o foco na importancia do crecemento económico base do benestar, xunto coa necesidade de determinación política tanto no querer como no saber facer. Os investimentos públicos, a regulamentación/ordenación económicas e o papel redistribuidor do Estado compoñen a análise da política económica existente, en contraste con aquela que sería necesaria no noso país e neste tempo.