William S. Burroughs, Patti Smith, Allen Ginsberg, Laurie Anderson, Frank Zappa, Philipp Glass, John Cage e Merce Cunningham, entre outros artistas underground dos 70, conforman o impresionante cartelazo de Nova '78, documental que recupera a gravación perdida do mítico evento homónimo que tivo lugar nun Nova York en plena efervescencia.

No centro, William S. Burroughs, artífice da convención e referente absoluto para os beatniks. Un pensador único, abandeirado da arte transgresora e política, e como ben mostra o documental grazas ás imaxes de arquivo restauradas por Aaron Brookner (Uncle Howard), un inconformista nato. Desde o magnífico recital poético de Allen Ginsberg até as descarnadas cancións de Patti Smith, Nova '78 revélase como unha lección maxistral de contracultura. Un documental que só é posible visionar nun estado de absoluta fascinación.