O personalísimo universo visual do ilustrador e autor de novela gráfica Lorenzo Mattotti (tamén colaborador de figuras como Lou Reed, Soderbergh e Antonioni) fúndese aquí co de Dino Buzzati, cuxo mítico libro adapta nesta xoia da animación moderna. A historia de como os osos acaban invadindo Sicilia para recuperar o fillo perdido do Rei Oso é en realidade unha parábola sobre a colonización, a apropiación cultural e a utilización despótica do poder cuxa potencia levouna á sección Un Certain Regard de Cannes. Infinito deleite plástico e capas de significado nunha obra que parte do infantil para acadar a universalidade.