Para arrancar as actividades do 11º aniversario de NUMAX, convidamos á cineasta Elena Duque a programar e presentar unha sesión de curtametraxes dirixidas a todas as idades. A selección creada por Duque para a ocasión leva por título Sharazan e ten como fío temático o mar. A sesión terá lugar na sala de cinema ás 12:00h con entrada libre até completar aforo.

A partir das 13:00h nas instalacións da Libraría celebraremos a nosa habitual sesión vermú amenizada pola santiaguesa Russ DJ, coñecida pola súa enerxía e a súa maneira de mesturar, sen poñerse límites de estilos, sempre poñendo énfase nos sons percusivos, na bass music e nos sons da cultura postclub.

Fotograma de À nous la liberté (René Clair, 1931)

Despois de xantar continuarán as actividades na sala de cinema. Ás 16:45h proxectaremos À nous la liberté, musical de 1931 dirixido por René Clair que ofrece unha visionaria sátira do consumismo e da mecanización do traballo industrial. Xa se pode reservar entrada na nosa web, sendo o acceso gratuíto para as abonadas de NUMAX escribindo un correo a [email protected] e indicando nome completo e título do filme.

A segunda sesión terá lugar ás 18:30h co filme de estrea desta semana, o moi emocionante Love Me Tender de Anna Cazenave Cambet protagonizada por unha incrible Vicky Krieps. De novo, a entrada será de balde para abonadas co mesmo sistema de reserva a través do correo [email protected].

Tamén ás 18:30h pero no espazo da Libraría dará inicio un xogo de preguntas e respostas no que poñeredes en práctica os vosos coñecementos sobre Cinema, Literatura e máis cuestións relacionadas coa Cooperativa NUMAX. Velaquí tedes o programa completo. Non faltedes!