O xoves 31 de maio ás 20:00 a Libraría NUMAX acollerá a presentación de Rockeros insurgentes, modernos complacientes, o ensaio de Fernán del Val que vén de publicar a Fundación SGAE. O acto será conducido polo investigador en estudos culturais na USC Zósimo López e nel participarán, ademais do autor, Israel Sanmartín, profesor e investigador de Historia na USC e o xornalista Xosé Manuel Pereiro.
As noites de verán no Cinema NUMAX teñen un nome: Nocturama. Neste 2018 temos preparada unha programación moi especial con obras esenciais que quedaron sen estrear no último ano en Santiago e grandes filmes clásicos e de culto en copias recén restauradas. As citas co mellor cinema de onte, hoxe e sempre terán lugar entre o 4 de xuño e o 30 de agosto de luns a xoves na sesión das 22:00h.
A terceira peza da actividade "Fóra dos museos" forma parte do traballo de campo levado a cabo por Víctor Said arredor de 1910, e que constitúe unha das primeiras achegas ao estudo etnográfico do noso país. A Libraría NUMAX exhibirá a partir do 22 de maio cinco bosquexos dos quince que se conservan na Fundación Barrié. Para inaugurar a mostra conversarán arredor do lema "Quen habita en nós?" na libraría o martes 22 de maio a partir das 20:00 Xosé Carlos Sierra, anterior director do Museo Etnolóxico de Ribadavia e Sabela L. Pato, comisaria da actividade. Ademais, no acto proxectarase o filme documental dirixido en 1940 por Antonio Román O carro e o home (cedido polo Museo do Pobo Galego). A entrada é aberta e de balde.
Andrés Goteira vén de facer historia ao recibir 13 galardóns nos Premios Mestre Mateo 2018 coa súa opera prima, Dhogs. O cineasta de Meira será o segundo convidado da tempada do ciclo A cor das palabras. Encontros con cineastas que organiza o Concello de Santiago en colaboración co Cinema NUMAX, cunha intervención que leva por título: «Despois de Dhogs, reflexións para un segundo filme». A cita, o sábado 19 de maio ás 11:30.
Manual de linternas preséntase como un catálogo de "incursións, excursións e reflexións científicas". Editado por Libros y Literatura, este mércores 2 de maio ás 20:00 na Libraría NUMAX contaremos coa responsábel da edición Marta Magariños, o xornalista Manuel Vicente e Manuel Collado e Borja Merino, dous dos autores do libro.
Estamos moi felices de anunciarvos a visita a NUMAX esta fin de semana de Nobuhiro Suwa, considerado pola prensa especializada como «o máis importante cineasta xaponés do século XXI» (Otros Cines). O cineasta nipón viaxa especialmente desde Xapón para presentar a estrea do seu novo filme, O león dorme esta noite, que chegará ás salas de todo o Estado da man de NUMAX Distribución.
