Un home (Sergi López) e o seu fillo (Bruno Núñez) chegan a unha rave perdida no medio das montañas do sur de Marrocos. Buscan a Mar, a súa filla e irmá, desaparecida hai meses nunha desas festas sen amencer. Reparten a súa foto unha e outra vez rodeados de música electrónica e un tipo de liberdade que descoñecen. Alí deciden seguir a un grupo de raveiros na busca dunha última festa que se vai celebrar no deserto, onde agardan atopar a moza desaparecida.

«Foi sen dúbida o meu filme máis difícil até a data, unha rodaxe extrema en localizacións de Teruel, épicas e fermosas por igual. Pasamos dos varios graos baixo cero das noites de inverno aragonesas á calor extrema do deserto do Sahara en pleno verán. Pero algo desa aventura desporporcionada que houbo detrás da cámara está no filme. Sirat é un filme intenso e vertixinoso no que o mineral afiado da paisaxe non vai deixar indiferente a ningún tipo de espectador» (Oliver Laxe)