Para as comunidades Q’eqchi’, a terra non é só o lugar onde viven e cultivan. A terra ten unha dimensión espiritual, forma parte da súa identidade e da súa memoria, e é tamén unha forma de entender a vida. É a terra o que os seus maridos defendían cando foron asasinados. É a propiedade da terra o xerme do xenocidio. E segue sendo o reparto da terra o maior foco de desigualdade e conflito de Guatemala. 

A través das voces das mulleres indíxenas da comunidade de Sepur Zarco, que enfrontaron aos seus agresores sexuais e ao propio Estado guatemalteco, e das organizacións que as acompañaron, este documental percorre a súa loita pola xustiza e pon o foco nunha das súas principais demandas sen resolver: a devolución das súas terras como única forma de facer xustiza e reparar o dano. 

A sesión, promovida e organizada pola ONGS AGARESO, terá entrada gratuíta até completar aforo e contará con presentación e coloquio da activista Paula Barrios.