Entre 1972 e 1974, o cineasta español Miguel Herberg infiltrouse nos círculos da extrema dereita chilena por iniciativa dos seus amigos Renzo e Roberto Rossellini e do uruguaio Danilo Trelles. Reuniu documentos, películas e fotografías que revelaban os preparativos do golpe de Estado, a implicación dos Estados Unidos e a represión da ditadura de Pinochet. As súas filmacións nos campos de concentración de Chacabuco e Pisagua contribuíron a denunciar as violacións dos dereitos humanos. Cincuenta anos despois, regresa a Chile para reencontrarse cos antigos presos políticos e recuperar esta historia de espionaxe cinematográfica e memoria histórica.